കാലിടറുന്ന മാതൃത്വം / KALIDARUNNA MATHRUTHWAM MALAYALAM ARTICLE

അമ്മ എന്ന വാക്കിന് ഒരു പാട് അർത്ഥമുണ്ട്, നമ്മുടെ ഭാരതീയ സങ്കൽപ്പത്തിൽ. സ്നേഹം, കരുണ, ദയ, കാണപ്പെട്ട ദൈവം, എന്നൊക്കെ, എന്നാൽ ഈ അടുത്ത കാലത്ത് നമ്മുടെ കൺമുന്നിൽ  കടന്നു വരുന്നത് നൊന്ത പെറ്റ കുഞ്ഞിനെ ശ്വാസം മുട്ടിച്ച് കൊലപ്പെടുത്തി, തീയിൽ ഒരു കരിയില ഇട്ടു കത്തിക്കുന്ന ലാഘത്തോടെ പിഴത് എറിഞ്ഞ്, കിണറ്റിൽ ഇട്ടും, കാമുകൻമാരുടെ തേർവാഴ്ചകൾക്ക് കൂട്ടികൊടുത്ത്. കഴുത്തറത്ത് കൊല്ലാൻ കൂട്ടുനിന്ന അമ്മമാർ, വാത്സല്യത്തിന്റെ ,സ്നേഹത്തിന്റെ പ്രതീകങ്ങൾ ആകേണ്ടവർ മക്കളുടെ അറും കൊലയാളികൾ ആയി മാറുന്നു. ഒറ്റപ്പെട്ട സംഭവങ്ങൾ പരമ്പരകൾ ആയി മാറുന്നു.

ദൈവത്തിന്റെ സ്വന്തം നാട് എന്ന് അഭിമാനിക്കുന്ന നമ്മുടെ കൊച്ചു കേരളം ദൈവം കൈവിട്ട നാട് എന്ന അവസ്ഥയിലേക്ക് തരംതാണു കൊണ്ടിരിക്കുന്നു. എവിടെയാണ് നമ്മൾക്ക് പിഴച്ചത്, നാശത്തിന്റെ മക്കൾ ആയത് എന്നാണ്, വീടിന്റെ അകത്തളങ്ങളിൽ എന്നാണ് ഇത്രയും വെറുപ്പ് നിറഞ്ഞത്. അമ്മയും മക്കളും തമ്മിൽ, മക്കളും മാതാപിതാക്കളും തമ്മിൽ അവിശ്വാസത്തിന്റെ കൊടും മതിലുകൾ ഉയർന്നു വന്നിരിക്കുന്നു. അമ്മയക്ക് മക്കളെ കൊല്ലാനും, മക്കൾക്ക് അമ്മയെ കൊല്ലാനും മടിയില്ലാത്ത കൊടും പാറ മനസ്സകൾ എന്നാണ് നമ്മുടെ കൊച്ചു കേരളത്തിന് സ്വന്തമായത്. എങ്ങോട്ട് ആണ് ഈ പതനയാത്രകൾ. അറിയാത്തതും, അറിഞ്ഞതുമായ സംഭവങ്ങൾ ധാരാളം വേറെയും ഉണ്ട്.സ്വന്തം ചോരയിൽ പോലും വിശ്വാസം നഷ്ടപ്പെട്ട നശിച്ച നാടായി നമ്മുടെ കേരളം മാറാൻ കാരണം നമ്മൾ ചിന്തിക്കേണ്ടിയിരിക്കുന്നു.

എവിടെയാണ് നമ്മൾക്ക് തെറ്റുപറ്റിയത്,

അമ്മ എന്ന വാക്ക്, നമ്മൾക്ക് എന്നും കലർപ്പില്ലാത്ത സ്നേഹം ആണ്. പല പരസ്യവാചങ്ങളിലും, എപ്പോഴും കാണുന്നതാണ്, അമ്മയുടെ സ്നേഹം പോലെ പരിശുദ്ധം,  കളങ്കമില്ലാത്തത് എന്നൊക്കെ.വീടിനെ പറ്റി നമ്മൾ ചിന്തിക്കുമ്പോൾ നമ്മുടെ മനസ്സിൽ ആദ്യം എത്തുന്ന ചിത്രം സ്വന്തം അമ്മയുടെതാണ്. അത്ര പരിപാനമായ ഒരു ദൈവ ദാനമാണ് മാതൃത്വം. ഒരോ സ്ത്രീയും ആ സത്യം മനസ്സിലാക്കണം, ആ നഗ്ന സത്യം .ദാമ്പ്യത്യം എന്ന വല്ലരിയിൽ വിരിയുന്ന മനോഹരമായ പുഷ്പങ്ങൾ ആണ് ഒരോ മക്കളും. ഒരു കുഞ്ഞ് ഒരമ്മയുടെ ഗർഭപാത്രത്തിൽ ഉരുവാകുമ്പോൾ ഒരു സ്ത്രീയിൽ ഒരു മാതൃത്വം കൂടിയാണ് ഉടൽ എടുക്കുന്നത്. കുഞ്ഞ് ജനിച്ച് പിച്ചവെയ്ക്കുമ്പോൾ, അവളിൽ ഒരു മാതൃത്വം പിച്ചവെയ്‌ക്കണം. ആദ്യ കുഞ്ഞിന്റെ ജന്മദിനത്തിൽ ഒരമ്മയും കുറിക്കണം എന്റെ ഉള്ളിലെ അമ്മയക്ക് ഇന്ന് ഒരു വയസ്സ് എന്ന്. സ്വന്തം ജീവനും,ആരോഗ്യവും, സൗന്ദര്യവും ,കഴിവുകളും തന്റെ മക്കൾ ക്ക് വേണ്ടി സമർപ്പിക്കുന്നവൾ ആണ് യഥാർത്ഥ അമ്മ. സ്വയം ശൂന്യവൽക്കരിക്കുന്ന  ആ സ്നേഹമാണ്  ഒരു കുടുംബത്തിന്റെ മൂല്യവേര് .അമ്മ ഒരു വിളക്ക് ആണ് .അത് പരത്തുന്ന പ്രകാശമാണ് ഒരു വീടിന്റെ വെളിച്ചം.മാത്യത്വം എന്ന പ്രതിഭാസത്തെ കേവലം ഒരു ജീവ ശാസ്ത്ര പ്രതിഭാസമായി കാണാതെ, മാനവികതയുടെ അടിസ്ഥാന യാഥാർഥ്യം ഒന്നായി മനുഷ്യർ തിരിച്ചറിയണം.ഈ അറിവും ബോധ്യവും ഒരോ അപ്പൻ മാർക്കും, മക്കൾക്കും ഉണ്ടാകേണ്ടത് ഉണ്ട്. അമ്മയനു ഭവിക്കുന്ന ക്ലേശങ്ങൾ അറിഞ്ഞിട്ടും, അറിയാത്തവരായി ഭാവിക്കുന്ന അപ്പൻമാരും ,മക്കളും, അവരെ നിരാശയിയേക്കും, പിന്നെ പത്ര മാധ്യമങ്ങളിൽ ഇന്ന് വായിക്കുന്ന ദുരന്തങ്ങളിലേയ്ക്കും ,തള്ളിയിടുന്നതിൽ ഒരു കാരണക്കാർ ആണെന്ന് എന്ന് ഒരു    രീതിയിൽ പറയാതെ വയ്യാ.

കുടുംബങ്ങൾ ഒന്നിച്ചുള്ള   സന്ധ്യാജപങ്ങൾ, ഒന്നിച്ച് ഇരുന്ന് ഒരു നേരം ഭക്ഷണം., ഇതൊക്കെ ഇന്ന്  ടീവി, സീരിയലുകളും, സോഷ്യൽ മീഡിയകളും കൈ അടക്കി കഴിഞ്ഞു. കൊടും വിഷം ചീറ്റുന്ന തരംതാണ സീരിയലുകൾ  കുടുംബ ബന്ധങ്ങളെ ആഴത്തിൽ ക്ഷയം ഏൽപ്പിച്ചു കൊണ്ടിരിക്കുകയാണ്. കുടുംബത്തിലെ പ്രശ്നങ്ങൾ എന്തെന്ന് പരസ്പരം മനസ്സിലാക്കുക .നിസ്സാരമായ പ്രശ്നങ്ങൾ ആരോടും പറയാതെ, മനസ്സിൽ ഇട്ട് പെരിപ്പിച്ച് അവസാനം കൊടും വ്യാധികൾ ആയി  ദുരന്തങ്ങൾ ആയി പരിണമിക്കുന്നു.  നമ്മുടെ നാട്ടിൽ നല്ല സൈക്കോളജിസ്റ്റു കൾ ഉണ്ട്. നല്ല ഫാമിലി കൗൺസിൽ സെന്ററുകൾ ഉണ്ട്.  ആവിശ്യമെങ്കിൽ അവരുടെ സഹായങ്ങൾ പ്രയോജനപ്പെടുത്തുക. കൂടുമ്പോൾ  ഇമ്പമുള്ള വേദികൾ ആകട്ടെ  ഓരോ കുടുംബവും.

നമ്മുടെ ഭവനങ്ങൾ  ദേവാലയങ്ങൾ ആയി തീരട്ടേ. ഒൻപതു മാസവും, ഒൻപതു ദിവസവും കുഞ്ഞിനെ വഹിക്കുന്ന ഗർഭപാത്രങ്ങൾ ,കൊലക്കളങ്ങൾ ആകാതെ ഇരിക്കട്ടേ, പാലൂട്ടുന്ന പയോധരങ്ങളിൽ വിഷം കലരാതെ ഇരിക്കട്ടേ, പാടി ഉറക്കുന്ന, ഊട്ടി ഉറക്കുന്ന ആ കൈകളിൽ ഇനിയെങ്കിലും കൊലക്കത്തികൾ വീഴാതെ ഇരിക്കട്ടെ എന്ന് ആത്മാർത്ഥമായി നമ്മൾക്ക് പ്രാർത്ഥിക്കാം.

ബിന്ദു മോൾ രാജു

...........................................................................

About Author

Bindumol Raju

22 ossingtion Drive 

Hamiltion on

Canada 

...........................................................................